Rohang Kalam jeung Daluang

Nyiar Luang ti Papada Urang

Tutug Oncom & Pencok Hiris

Posted by bujanggamanik dina Juni 6, 2008

Ku Asép Ruhimat

Tutug Oncom

Bubuhan kuring mah urang lembur, jadi sasarap gé teu jiga barudak di kota ayeuna. Atuh sakola ogé sakitu ngangkleung jauh bari jeung badarat, taya tutumpakan, kajaba balikna sakapeung sok kaparengkeun tarumpak roda sapi.

Rebun-rebun kénéh Ema geus namplokkeun sangu kana dulang, diakeul. Tah, mangsana sangu diakeul, tangtu nya panas nya ngebul. Katiténan sok dicampuran oncom beuleum beunang ngaréndos. Sambarana ogé teu bangga, ukur uyah, cikur, bawang beureum, jeung céngék sababaraha guluntung. Diréndos dina coét batu rada gedé disakaliguskeun jeung beuleum oncom téa. Saterusna mah nya digalokeun kana sangu dina dulang atawa dina boboko. Tah, kaolahan jiga kitu téh disebutna tutug oncom.

Mun kira aya kénéh waktu, nya sasarap heula di imah. Tapi, mun rada elat sarta bakal kabeurangan, tutug oncom téh sok dibungkus wé ku daun cau, didahar bari leumpang di jalan. Diambéng téa ngaranna téh. Ngan rokaya ninggang leumpang lebah galengan, tampolana sok tigedebut labuh bubuhan tara pati nénjo tincakeun.

 Pencok Hiris

Aya deui kaolahan anu ngeunah didahar tengah poé téh. Atuh diréndonkeun jeung sangu poé ogé teu masalah deuih, nyaéta pencok hiris.

Nyieunna teu hésé deuih. Hiris gé di lembur mah teu saeutik anu ngahaja melak, kaasup di pipir imah kuring. Bubuhan kasebut budak lembur, tara ieuh suda kana barang dahar, sakur nu dijagragkeun ku Ema sok dideluk wé da puguh ngeunah.

Cara nyieunna, teu hésé, hiris diréndos jeung sambara kayaning uyah, tasasi, asem, céngék, cikur, jeung gula. Méh sarua jeung pencok kacang panjang, jadi sing karasa haneut cikurna.

Ari ngadaharna, tangtu baé dicocol atawa langsung digalokeun jeung sangu. Puguh wé ngeunah jeung seger.

Tina Sambel Jaér, Karya Asep Ruhimat

 

 

12 Balesan to “Tutug Oncom & Pencok Hiris”

  1. gajahkurus said

    Janten emut jaman kapungkur upami dipiwarang ngakeul sangu ku pun biang, sok cukilna sok hihidna, buruhna dipangdamelkeun tutug oncom.
    Pencok hiris? Langki eta mah nu sering mah pencok kacang panjang sareng rujak peutey selong. Ngarujak peuteuy selong di lisung nu sok dianggo nutuan pare, atuh dibuburak ku nu gaduhna da cenah kotor sareng bau peuteuy kana beasna.
    Janten nineung lalakon keur budak, upami diemut-emut deui mah😀

  2. pribumi said

    Mun diserat atuh sadayana pangalaman Ayi kapungkur waktos di lembur teh. Tangtos bakal benten sareng pangalaman Kang Asep. Janten ngeuyeub-ngeuyeub referensi panineungan urang Sunda. Eta seratan anu mangrupi panineungan Ayi teh bakal ageung mangpaatna kanggo nambihan pangaweruh barudak ayeuna dina hal budaya sareng jati diri urang Sunda. Sok diantos seratan2ana dina basa Sunda!!

  3. Duhh…. kabita ku tutug oncom….. asa emut… ka metua indah…..😀

  4. pribumi said

    Kang Awan kagungan pangalaman ngeunaan katuangan urang Sunda? Sok atuh serat dina basa Sunda!

  5. nety said

    duh eta kang asep rumimat carpona..ngabibita ah..

  6. urang said

    uenak tenan

  7. Aang Zaeni said

    Aduh kang meni matak ngaruy jeng kabita pisan inget ka lembur upami nyarioskeun pencok hiris teh…nya kitu gening kang ari disurabaya mah teu aya hiris…

    hatur nuhun kang…

  8. henirusli said

    Kang Aang teh di Surabaya? Boro-boro hiris, dalah leunca ge meni sesah milarianana. Emut keur di Surabaya dua taun kapengker, hoyong karedok leunca meni alhbatan naon. Hesena meni nataku. Sacoet karedok teh, nyeepkeun artos aya kana lima puluh rebu na. lima rebu kanggo ngagaleuh leuncana, nu opat puluh lima rebu kanggo ongkos taxi-na, hehehe.

  9. cepotsofyan said

    tos lami teu ningal “hiris”… meni kabita

  10. Di Cimahi oge teu aya Yi, rupina kedah angkat ka daerah-daerah nu lega kebonna.

  11. achmad kadarsah said

    Teh nembe maos paneneungan , aduh sae pisan teh , ari abdi mah ke pun biang sok dipanggejoskeun oncom hideung nganggo cikur ,

  12. I absolutely love your blog and find a lot of your post’s to be precisely what I’m looking for.
    Would you offer guest writers to write content in your case?
    I wouldn’t mind writing a post or elaborating on a few of the subjects you write concerning here. Again, awesome website!

Kantunkeun Balesan

Fill in your details below or click an icon to log in:

WordPress.com Logo

You are commenting using your WordPress.com account. Log Out / Robih )

Twitter picture

You are commenting using your Twitter account. Log Out / Robih )

Facebook photo

You are commenting using your Facebook account. Log Out / Robih )

Google+ photo

You are commenting using your Google+ account. Log Out / Robih )

Connecting to %s

 
%d bloggers like this: