Rohang Kalam jeung Daluang

Nyiar Luang ti Papada Urang

Duit

Posted by bujanggamanik dina Januari 2, 2008

money_flow.jpgIsuk-isuk basa Apa rék ka kantor, Ujang jeung Nyai geus aya di buruan, megat Apa. Kadéngé Nyai nyarita lalaunan. Bari semu ogo, majar téh, “Ngiring ka kantor, Apa…”

Apa seuri. Geus sababaraha kali Nyai atawa Ujang nyarita kitu, naha teu bosen? Lantaran masing kalah kumaha ogé Apa moal bisa nedunan paménta hidep duaan—rék naon mamawa budak ka kantor?

Sakali deui Nyai ngarenghik hayang milu, ari Ujang terus melong ka Apa bangun nu moho pisan hayang diajak. Bet asa papanggih jeung kalangkang Apa sorangan, baréto. Nya kitu sok hayang milu ka aki hidep upama anjeunna rék angkat ka sakola, rék ngawulang. Kalangkang sorangan anu pohara hirupna bet mindeng eunteup dina paneuteup hidep duaan ayeuna. Apa resep nanggapna, mulangkeun deui panineungan ka mangsa Apa keur sagedé hidep, wararaas.

Tapi wondening kitu, teu pok ari nyeburkeun yén Apa kabita deui hayang kawas hidep mah—hayang ulin ulukutek di jero imah, di pipir, di jalan, di sampalan nu teu jauh ti imah. Capé-capé nyelang balik heula, hayang nginum atawa ménta dahar.

Enya, dunya téh pinuh ku pangulinan, pinuh ku kaulinan, cék hidep mah. Teu saperti pikeun Apa ayeuna—dunya téh pinuh ku pagawéan nu kudu disanghareupan keur nyambung-nyambung hirup sapopoé.

Dunya téh lahan anu pohara gumblung-gamblangna pikeun hidep mah—imah ogé lega lir gedong sabau, buruan lir sampalan, kulah lir talaga nu bisa dilayaran ku parahu kalakay balingbing. Sedengkeun pikeun Apa mah, dunya téh aya kalana karasa rupek upama nyorang kasumpeg haté nu dilantarankeun ku sulitna kahirupan.

Dunya téh pinuh ku tempat-tempat nu pikabetaheun mungguhing pikeun hidep mah—handapeun akuarieum bisa dibebenahan jadi kamar leutik keur anjang-anjangan, handapeun tangkal mamangkokan bisa dililinggih keur susumputan beling. Demi pikeun Apa mah dunya téh sakapeung mangrupa tempat-tempat nu pikaboseneun upama pareng aya dina poé-poé nu tiis jeung sué.

Nu matak, cék Apa téh, naha maké hayang milu ka kantor? Nu puguh mah Apa nu hayang milu ka hidep, ka alam pangulinan hidep duaan, di mana ciptaan hidep mekar ngeusian patempatan-patempatan nu aya dina ségog-ségog imah, buruan, dunya, jeung langit.

Tapi naha geus pok deui baé Ujang jeung Nyai nyarita ka Apa, hayang milu ka kantor? Meureun duméh cék ciptaan hidep mah di kantor téh aya gudang duit nu ku Apa bisa dibuka tuluy dicokotan duitna kalawan gampang.

Jigana tina perkara duit mah antara hidep jeung Apa téh sarua pada-pada butuh, pada-pada hayang. Ujang jeung Nyai hayang jajan baso, atawa céndol, saperti Apa hayang bisa meuli sakur kaperluan hirup rumah tangga.

Duit. Duit. Duit. Kecap duit téh murwakanti jeung kecap pait, malah upama teu inget kana harti jeung kagunaanana mah, ngadéngé kecap duit téh kaciptana bangun mangrupa barang nu hideng jeung pait. Tapi saperti nu geus kasaluyuan ku urang sakabéh, ku hidep jeung ku Apa, jeung ku sakabéh jelema, duit téh nya éta hiji barang anu amis rasana, ngeunah mibogana. Anu béda antara hidep jeung Apa, iwal ti néanganana. Cék hidep mah gampang, kari nyokotan tina gudang, cék Apa mah hésé, da gudangna gé euweuh, kudu ditéangan heula.

 

(Tina Anaking Jimat Awaking, karya Wahyu Wibisana)

2 Balesan to “Duit”

  1. Awesome! Its genuinely remarkable paragraph, I have got much clear idea regarding from this post.

  2. Fantastic items from you, man. I’ve take note your stuff prior to and you’re
    just extremely fantastic. I really like what you’ve received right here, really
    like what you are stating and the way in which wherein you are saying it.
    You are making it entertaining and you continue to care for to stay it
    wise. I can not wait to learn far more from you. This is
    really a tremendous web site.

Kantunkeun Balesan

Fill in your details below or click an icon to log in:

WordPress.com Logo

You are commenting using your WordPress.com account. Log Out / Robih )

Twitter picture

You are commenting using your Twitter account. Log Out / Robih )

Facebook photo

You are commenting using your Facebook account. Log Out / Robih )

Google+ photo

You are commenting using your Google+ account. Log Out / Robih )

Connecting to %s

 
%d bloggers like this: